【Day 10】
旅程到了第十天終於發生了戇居的事情…
話說今日打算去Postojna Cave，而由Ljubljana去Postojna聽聞只需大概一個小時既車程。
我以為自己已經好打醒十二萬分精神，睇住窗出面環境如何，又計住自己隻錶既時間，加上上車前睇到第一個站就落車。心諗：實無有怕！
點知未到一個鐘司機就靠左個車站停底，成格車只有兩個人落車，加上個站好簡陋，點睇都唔似一個遊客區既地方。心又諗：呢個應該唔係Postojna。
等司機再開車，跟住打後既路段都係往上爬，風景愈來愈靚。正當我沉醉當中之際，我突然察覺到有小小唔對路：已經行駛左成個半鐘，而且極目望向前都係無止境既高速公路。
開始有小小淆底。即刻係咁睇對面線既路牌，竟然俾我發現指往Postojna既方向！個時仲抱住一線希望覺得係自己眼花。駛左差唔多兩個鐘多小小終於停站，即衝落車問司機呢度係咪我想去個度，點知佢個答案係：No, should be the previous one.
我立時大叫：What the fuck！
個司機竟然和應我：Oh yes, what the fuck！
之後點？咪只好好似香港搭巴士咁，去番對面線搭返一個站囉。問題只係呢度既一個站閒閒地都成粒鐘。如是者由原本只需一個鐘既車程我總共用左接近三粒鐘先去到。
好彩個Cave五月開始係收五點，仲趕到參加最後一場既Tour。(補充：我係巴士站已經買左入場券，盛惠€18.5，即係我趕唔切既話就蝕哂！)
呼~倒抽一囗涼氣！
不過諗諗下我俾左一程車錢，就坐多左一程半既車，沿途仲有咁靚既風景，值回票價！而且成個旅程有高低起伏先精彩架嘛！
講番個Cave，佢係(聽講)世上唯一一個地底洞穴係有路軌可以俾你好似坐火車咁遊覽，坐左陣就需要用腳行。其實我真係覺得好宏偉同壯觀，單靠用囗描述同睇相都形容唔到佢有幾靚，所以呢度係一個好值得去參觀既地方。再提一提，25歲以下人士人場係有折扣價！未到25歲既你想去就拿拿聲去啦！
Blog：http://backpackersopoor.blogspot.hk/
Blog:http://blog.ulifestyle.com.hk/blogger/backpackersopoor/
Search